|
|
楼主 |
发表于 2009-3-14 22:11:31
|
我爱嘅城市已黄昏
金星影院终于停业嘞，执笠已成定局。
我嘅记忆之城，亦都好似正喺度一啲一啲咁“冧”紧。
金星执咗，但系喺我嘅心深处，仲停住好多同佢有关嘅画面。细细个嗰阵，有一个暑假嘅某日，老窦带住我去大三元饮茶食饭，然后行佢一直都钟意嗌做“嚤啰街”嘅上下九，行到晏昼太阳就嚟落山嘞，就行过恩宁路去金星睇戏，仲记得嗰阵影院招牌就已经着晒五光十色啲走马霓虹灯嘞，仲记得嗰日红红黄黄嘅落日影子系点样映喺影院嘅招牌同电影海报上面，仲记得老窦抱住我行上嗰条“喀喀”声嘅木楼梯……
后来我大个女嘞，天气好时，一放工，男朋友就嚟接我一齐喺伍湛记食完粥先拖住手仔去金星电影院睇戏，嗰阵嘅落日余晖，硬系好似比依家温暖，虽然，嗰个男仔依家已经唔喺度、再都唔可以同我一齐睇电影嘞，但系嗰啲金黄嘅落日、剪影嘅轮廓、拖住我手行过长街嘅时候，一直温暖我心头。
呵，系啰，点到人唔感慨呢，旧日嘅城市印记被时间同埋社会进步一啲一啲咁洗去，大三元执咗、清平饭店拆咗、成珠楼冇咗、南大执咗、农林礼堂散咗……我仲记得喺农林礼堂睇嘅最后一场电影，系“玻璃樽”，电影里面，舒淇嘅娘亲同舒淇讲（大意）：“真正忘记一个人呢，就系有一日你喺度做下呢样做下嗰样嘅时候，忽然间谂起嗰个人，然后谂‘哦，系有呢个人’，咁你就真系忘记咗佢嘞”。有一啲人，有一啲事，有一啲地方，我愿意生生世世都铭记于心。可惜，嗰个人嘅面目已经开始模糊嘞，有啲我原先以为会至死不渝嘅情景，亦都喺度慢慢变色变淡，就连地方，要么湮灭喺城市高速发展嘅洪流里面，要么慢慢慢慢咁搬新窦口换咗新模样。机场成个都搬咗，留返条机场路，东山划分俾越秀区，自此东山已非区……
随着城建步伐加快，广州真系愈来愈靓，有外地朋友来嘅时候，我好骄傲咁带佢哋行江边游车河去露天吧晒月光，睇，呢个先叫国际化大都市嘛。但系，喺我心深处，始终充满依依，听讲不少土生土长嘅老人家都唔多识依家啲路嘞，呵他年我亦为耆英，戴住副老花镜，点样同啲子子孙孙讲：“东山，以前系个好大嘅区嚟架，住喺呢度左近嘅人都非富则贵，哼哼，你老太太我花样年华时就系喺度呢度生活架。”“西关，是你老太太我成家立室嘅地头，你们嘅爹或娘就系喺度出世噶啦”……咁多咁多陪住我哋成长、俾咗无数悲欢回忆我哋嘅地方，都散嘅散、变嘅变晒嘞。
听讲人死后，灵魂会喺生前留恋过嘅地方收拾脚印，我好惊喺嗰阵时自己嘅灵魂会喺熟悉并且始终依依嘅城市里面荡失路，然后，揾唔返曾梦回几廿万次嘅脚印，然后孤零零咁对住陌生嘅旧地弗弗低泣。
好快，广州将会成为每一个广州人都引以为傲嘅城市，新、净、正、靓。嗰一座旧、矮、乱、甚至残嘅城市会刻喺我记忆里面，再都返唔转头嘞，再都返唔到去嘞，只系剩得我自己、同我嘅心知道，记忆里面嘅嗰座城市，最终会随岁月老去 |
|
发表于 2009-3-14 22:35:35
|
|小黑屋|手机版|Archiver|广青启智服务总队、启智社会工作服务中心——志愿者协会义工、公益爱心网，咨询电话：1986-001-1205【联合国会议通过：1986年12月5日是第一个国际志愿者日】（办公时间10:00-17:00）
( 粤ICP备11064003号★★工作再忙，也要及时行善★★【做合格党员，做志愿者，做合格公民，做志愿者】 )本网站实行严格审核加入制度，如果你无法注册发帖，请咨询QQ群：102626，邮箱：qizhi@1205.cn
，联系电话：1986-001-1205【联合国会议通过：1986年12月5日是第一个国际志愿者日】（办公时间10:00-17:00）
IP卡
狗仔卡
发表于 2009-3-14 22:10:39
